«Կարին» ավանդական երգի-պարի խումբը ստեղծվել է 2001թ.-ի սեպտեմբերի 21-ին: Խմբի հիմնադիրը ՀՀ մշակույթի վաստակավոր գործիչ
Գագիկ Գինոսյանն է:

2005թ․-ից սկսվեցին «Մեր պարերը և մենք» խորագրով պարուսուցման ամենամսյա բաց դասերը «Նարեկացի» արվեստի միության սրահում։

Արդեն 20 տարի է, ինչ յուրաքանչյուր ամսվա վերջին ուրբաթ օրը՝ երեկոյան, հարյուրավոր հայեր՝ անկախ տարիքից, նախասիրություններից և մասնագիտություններից միավորվում են ավանդական մշակույթի շուրջ՝ միասին պարելով և սովորելով։ Այս միջոցառումը տարիների ընթացքում ավանդական մշակույթին է ծանոթացրել հարյուր հազարավոր մարդկանց։ Հենց այս երեկոներն են շատերիս մեջ արթնացրել ինքնաճանաչման ճանապարհով գնալու անմար կայծը։

Հայ անվանի պարագետ, «Կարին» ավանդական երգի-պարի խմբի հիմնադիր, ՀՀ մշակույթի վաստակավոր գործիչ Գագիկ Գինոսյանը համոզված էր, որ ավանդական մշակույթը երեխաները պետք է ուսումնասիրեն վաղ տարիքից։ Նրա հեղինակած «Ազգային երգ ու պար» առարկան 2011թ․ առաջին անգամ փորձարկվեց «Այբ» դպրոցում։ 2014-ից առարկան ներդրվեց ՀՀ դպրոցներում, իսկ այժմ  Հայաստանի 463 դպրոցի 5-7-րդ դասարանցիները արդեն«Ազգային երգ ու պար» առարկան են անցնում։ Տարիների ընթացքում մեր կողմից վերապատրաստվել է 600-ից ավելի ուսուցիչ։

«Ազգային երգ ու պարի ակադեմիա» կրթամշակութային հիմնադրամը հիմնադրվել է «Այբ» կրթական հիմնադրամի և հայ անվանի պարագետ, բանահավաք, հասարակական գործիչ, «Կարին» ավանդական երգի-պարի խմբի հիմնադիր, ՀՀ մշակույթի վաստակավոր գործիչ Գագիկ Գինոսյանի կողմից։

Հիմնադրամի առաքելությունն է ազգային երգերն ու պարերը վերադարձնել կենցաղ, դարձնել հայ ժողովրդի կենդանի մշակույթի մաս, որի կրողը պիտի դառնա յուրաքանչյուր ոք։

ՅՈՒՆԵՍԿՈ-ի Mandorlo in Fiore փառատոնում պատվավոր 3-րդ մրցանակ՝ «Սասունցի Դավիթ» ներկայացում:

«Պարք Բանակաց» գիրքն իր մեջ ամփոփում է  թվով 15 հայկական ավանդական  ռազմապարերի մանրամասն նկարագրություն և մի քանի հոդված՝ հայ ավանդական պարերի կառուցվածքի, զինվորի առօրյայում ռազմապարերի դերի կարևորության և ռազմական հոգեբանության վրա ունեցած դրական ազդեցության մասին։

Նախկինում գրանցված ազգագրական նյութերը վերականգնելու և նոր ուսումնասիրություններով հանդես գալու անհրաժեշտությունից ելնելով՝ Գագիկ Գինոսյանի նախաձեռնությամբ և գլխավորությամբ 2018 թվականին հիմնվում է հայ ավանդական մշակույթի ուսումնասիրության և հետազոտման «Կարին» գիտական կենտրոնը։

«Ղողանջ հարսանեկան»՝ ըստ Պարույր Սևակի «Անլռելի զանգակատուն» պոեմի։ Նվիրված էր Կոմիտասի 150 ամյակին։

«Վարք Կարնո»-ն համերգ էր՝ նվիրված խմբի գործունեության 20-ամյակին։ Այն պարզապես համերգ չէր, այլ 20 տարիների ընթացքում արված աշխատանքի մի մե՜ծ հաշվետվություն։

2022-ին կազմավորվեց «Կարին» նվագախումբը։ Գեղարվեստական ղեկավար՝ Մանվել Շախկյան։

Այս համերգը մի երևակայական դուռ էր, Կարնո Դուռը դեպի ազգային պարեր, երգեր և ավանդազրույցներ՝ գրանցված բացառապես Կարնո տարածաշրջանում:

Տարիներ տևած բանակցություններից հետո՝ 2023թ․-ի սեպտեմբերից,  ՀՀ ՊՆ Վազգեն Սարգսյանի անվան ռազմական ակադեմիայում և Մարշալ Բաղրամյանի անվան համազորային ուսումնական կենտրոնում սկսվեցին փորձնական դասերը։ Նախատեսում ենք ծրագրի շրջանակներում ներգրավել նաեւ ՀՀ ՊՆ մի շարք այլ զորամասերի, իսկ վերջնարդյունքում ամբողջական ԶՈւ-ին ենթակա կառույցների ու զինծառայողների։

Մեզ համար շատ բարդ ժամանակաշրջանում՝ Գագիկ Գինոսյանի մահից հետո, հավաքելով մեր բոլոր ուժերը, մեկնեցինք ՌԴ՝ ավարտին հասցնելու «Ես մի Զարկն եմ քո բազկի» համերգային ծրագիրը։

«Կարնո Ձայն» մենահամերգի ծրագրում եղան ինչպես հայկական ավանդական երգերի ու մեղեդիների նոր մշակումներ, այնպես էլ հեղինակային կատարումներ։ Համերգի մենակատարներներն էին Արամ Մովսիսյանը, Սուսաննա Նաջարյանը, Ժաննա Դավթյանը, Ռուզաննա Ղարաջյանը և Մերի Լևոնյանը։

Ի սկզբանե Գագիկ Գինոսյանի նպատակն էր ունենալ գաղափարական զրույցներով հարուստ և ինքնաճանաչմանն ու ավանդական մշակույթին խորապես ծանոթանալուն ուղղված արշավներ, ինչպես նաև մշակութային այցեր ամբողջ Հայաստանով։