«Ծովակ» ավանդական երգի-պարի խումբը հիմնադրվել է 2001թ.-ին հայ պարագետ, բանահավաք, ՀՀ մշակույթի վաստակավոր գործիչ, «Կարին» ավանդական երգի-պարի խմբի հիմնադիր Գագիկ Գինոսյանի կողմից։ Խումբը կրում է հայ կոմպոզիտոր, ՀԽՍՀ մշակույթի վաստակավոր գործիչ Ծովակ Համբարձումյանի անունը:
«Ծովակը» միավորում է պատանիներին և երիտասարդներին հայ մշակույթի ուսումնասիրման, սերտման և տարածման առաքելության շուրջ՝ նպաստելով ազգային արժեքների պահպանմանը, ինքնության գիտակցմանն ու ամրապնդմանը:
Խմբի երաժշտական մասի ղեկավարը երգչուհի Անուշ Բալբաբյանն է, ում ուսուցման հատուկ մեթոդաբանությունն ու անհատական մոտեցումները նպաստում են ազգային երգերի ճիշտ և գրագետ կատարմանն ու ասելիքի փոխանցմանը։
Խմբի պարուսույցը Աբել Մաթևոսյանն է, ով պարերի և շարժումների խորքային ուսումնասիրությամբ պահպանում և ճշգրտում է բազում պարային նմուշներ՝ փոխանցելով դրանք խմբի անդամներին։ Նրա շնորհիվ բեմում են ներկայացվում և երկրորդ կյանք ստանում մոռացված, բայց արժեքավոր պարանմուշներ։
«Ծովակն» իր գործունեության 24 տարվա ընթացքում մասնակցել է մի շարք միջոցառումների և համերգների, ստացել է բազում պատվոգրեր ու հավաստագրեր: Համերգներով հանդես է եկել դպրոցներում, զարգացման կենտրոններում, զորամասերում, վարել է ավանդական տոնախմբություններ՝ Զատիկ, Բարեկենդան, Ծաղկազարդ և այլ տոներին: Իր մասնակցությունն է ունեցել նաև «Կարին» ավանդական երգի-պարի խմբի թատերական ներկայացումներին՝ «Հայոց երգի հայրիկը», «Խնգահոտ Էրգիր», «Ղողանջ հարսանեկան», ինչպես նաև խմբի 15, 20-ամյակներին նվիրված և այլ համերգներին։
«Ես մի բանաձև ունեմ, որը սկսվում է «ինքն» արմատով . մարդը պետք է լինի ինքնաճանաչ, դրանից պետք է ծնվի ինքնահարգ լինելու գաղափարը, ապա` ինքնիշխան ապրելու գիտակցումը: Ինքնաճանաչն առաջին աստիճանն է, ինչն էլ փորձում ենք տալ մեր երիտասարդությանը. ճանաչել ինքդ քեզ, քո պատմությունը, լեզուն ու մշակույթը»:
Գագիկ Գինոսյան
«Մարդու վրա ներազդելու, նրա մեջ ազգային նկարագրի կարևորությունը սերմանելու, ազգային ակունքներից սնվելու և տեսակն ավելի բազմապատիկ դարձնելու ավելի լավ միջոց դժվար է գտնել, քան պարն է»: